archiv

Igl atun 2023 ha l’uniun da teater dau il toc “Tuttenina milliunari”, ina cumedia sursilvana tenor Erich Kästner ed elaborada libramein da Manfred Veraguth. Dau il toc han Georgina Janki, Patrizia Tönz, Guido Tschuor, Curdin Venzin, Lea Andreoli, Roman Niederberger, Martina Beeli e Stefanie Lombris. Sin tribuna ein denton buc mo els stai, mobein era auters commembers ed autras commembras – pigns e gronds. En in hotel – pardon, center dil beinesser – dat ei la finala ina massa hosps.

Cuntegn:

Il directur dil Center dil beinesser Auacaulda spitgava in milliunari che dueva secapescha vegnir tractaus en uorden. Mo ei ha dau in scumbegl, ed il milliunari supponiu era gnanc in rehun.

Il toc humoristic era in’adattaziun libra e moderna dil raquent “Drei Männer im Schnee” dad Erich Kästner e dil teater “Zäh Tag Gratisferie” da Max Schmid e Leo Seidl ed ha giugau en in hotel da wellness modern.

Suenter la liunga pausa empau sfurzada duront la pandemia havein nus entschiet plein schlontsch las provas per nies niev toc da teater «Il gat» la stad 2022. La cumedia sursilvana in tec criminala ha nies reschissur Manfred Veraguth scret. Il gat ha zuar giu mo ina rolla davos las culissas, sin tribuna ein ils suandonts stai: Roman Niederberger, Georgina Janki, Patrizia Tönz, Guido Tschuor, Anna Welter e Curdin Venzin.

Cuntegn:

Stefan duvrava daners ed el haveva fatg in plan per in enguladetsch ch'era tenor el grondius:"Aschi in bien plan d'engular ha ei aunc mai dau!" Mo per regla san ins buc planisar tut, ei schabegia adina zatgei nunspitgau aschia che siu amitg ha stuiu constatar: "In scheni criminal eis ti buc!" Il gat ha lu fatg in streh atras il quen a Stefan e tradiu che lez era sez il lader.

La cumedia in tec criminala “Il gat” ha raquintau cun bia humor d'in plan genial e co quel ei grondiusamein dalla glatscha giu.