archiv

Il toc Alla catscha dil cilender ei ina cumedia en treis acts da Peter Hinrichsen. Nus vein dau il toc ella versiun romontscha dad Erwin Caduff. Il cuntegn: Il pur Anton Stretg e siu amitg, il barbier Nutli, han omisdus tschaffen dalla pura e vieua Frena Bigliel. Lezza sa denton nuot da siu cletg. Il cuntrari: Frena ha giu in siemi curios e lai interpretar quel dalla hermerina Apolonia. E lezza enconuscha la muntada dil siemi: Frena duei maridar in um cun cilender e cassacca ch’ella entaupa allas tschun sper la caplutta. Pia nuot cun Anton ni Nutli. Mo cu lezs dus endrieschan las spetgas da Frena, entscheiva la concurrenza denter Anton e Nutli, ni meglier getg la catscha dil cilender: Omisdus fan tut il pusseivel e nunpusseivel per survegnir ina cassacca ed in cilender.

Giugau han: Lea Andreoli, Martina Beeli, Roman Niederberger, Guido Tschuor, Curdin Venzin ed Anna Maria Welter. Reschia: Berthold Derungs.

Igl atun 2023 ha l’uniun da teater dau il toc Tuttenina milliunari, ina cumedia sursilvana tenor il raquent Drei Männer im Schnee dad Erich Kästner ed il teater Zäh Tag Gratisferie da Max Schmid e Leo Seidl. Il classicher ei vegnius adattaus allas relaziuns dad oz – el gioga en in hotel da wellness modern: Leu vegn spitgau in milliunari. Mo il milliunari supponiu ei gnanc in rehun, quei dat bia scumbegls e malcapientschas.

Dau il toc han: Lea Andreoli, Martina Beeli, Georgina Janki, Stefanie Lombris, Roman Niederberger, Patrizia Tönz, Guido Tschuor e Curdin Venzin, Sin tribuna ein denton buc mo els stai, mobein era autras commembras ed auters commembers: Anna Maria Welter, Lena Tschuor, Nora Veraguth, Mattia Steinhauser, Flurin Veraguth. En in hotel – pardon, center dil beinesser – dat ei la finala ina massa hosps. Reschia: Manfred Veraguth.

Suenter ina pausa sfurzada pervia dalla pandemia dil virus corona havein nus puspei entschiet a dar teater plein slontsch. Quella ga havein nus dau ina cumedia sursilvana in tec criminala, vul gir in crimi senza unfrendas e strusch sanguinus, mo tuttina plein tensiun, nua ch’oravontut la polizia muossa saung giudezi. Il toc Il gat raquenta cun bia humor d’in plan genial e co quel va dalla glatscha giu: Stefan drova daners ed el ha planisau in enguladetsch tenor el grondius: «Aschi in bien plan d’engular ha ei aunc mai dau!», eis el perschuadius. Mo per regla san ins buc planisar tut ed ei schabegia adina zatgei nunspitgau. Ed en quei cass ei vegniu fatg il quen senza in gat.

Sin tribuna ein stai: Georgina Janki, Roman Niederberger, Patrizia Tönz, Guido Tschuor, Curdin Venzin ed Anna Maria Welter. Per musica ha l’Uniun da musica Sagogn procurau. Reschia: Manfred Veraguth.

Il toc Finalmein 50!tematisescha il vegnir vegls. Tgi stess buc pli bugen giuvens? E tgei fa quella cefra magica da 50 onns cun ins? Ein ins cun tschunconta propi ina veglia honta? Il toc sebasa sin quellas damondas e selai descriver cuortamein aschia: Clau ei tut ord il moni. Ensemen cun gidontras e gidonters organisescha el ina fiasta da surpresa per sia dunna Annatina che sa festivar il 50avel. Lezza sesenta denton mo empau bein cun patertgar da vegnir 50 e vess pli bugen siu ruaus. «Jeu sai buc daco che ti fas aschi in teater», manegia Clau siper sia dunna, «tuts vegnan pli vegls». Quella constataziun en sesez gesta, denton pauc ponderada, ha consequenzas. Sa sche Clau sa tuttina aunc far la fiasta planisada?

Sin tribuna ein stai: Martin Beeli, Georgina Janki, Stefanie Lombris, Roman Niederberger, Lea Pfister, Guido Tschuor, Curdin Venzin, Anna Maria Welter. Reschia: Manfred Veraguth.

Il toc Gion Tumasch va ell’uiara ei oriundamein vegnius presentaus sco toc da 30 minutas al Festival da teater a Tusaun 2018 ed ei era vegnius presentaus alla Biennala svizra dil teater d’amaturs 2018 ad Eglisau. Per la producziun annuala havein nus fatg ord quella cumedia sursilvana d’in act ina versiun en quater maletgs cun suandont cuntegn: Gion Tumasch Camartgoli mira televisiun e vesa uiara ch’igl ei uiara egl Irac. Secapescha ch’el sa en quei mument buc star a casa culs mauns en sac e far nuot. El sedecida dad ir ell’uiara e far fin a quella. Gl’emprem va el denton aunc ell’ustria dil vitg per beiber in caffé d’adia – mo ei resta buc tiel caffé – e nies bien schuldau sededesta silsuenter tut zanua auter. Vegn zatgi da metter si tgau a Gion Tumasch?

Sin tribuna ein stai: Martin Beeli, Georgina Janki, Stefanie Lombris, Roman Niederberger, Lea Pfister, Guido Tschuor, Curdin Venzin, Anna Maria Welter. Reschia: Manfred Veraguth.

La cumedia taliana La locandiera da Carlo Goldoni ei in toc renomau che gioga a Firenza igl onn 1753. Nus vein empruau da crear l’atmosfera da lu, cun bials costums barocs. Mirandolina meina ina locanda a Firenza. Ella ei ina buna ustiera e tut ils umens che prendan alloschi s'inamureschan dad ella. Il marches da Forlipopoli ed il cont d’Albafiorita han mo ord quei motiv ina combra leu. Il cavalier da Ripafratta para denton buc dad esser impressiunaus da Mirandolina. «Dunnas? Tuttas ensemen enta peis!», manegia el. Pil marches e pil cont munta quei in rival pli pauc, mo Mirandolina ei memia loscha per buc vuler cumprovar che tut ils umens seigien tuttina. Tgi sto ceder, il cavalier ni Mirandolina?

Giugau teater han Gion Beeli, Martina Beeli, Georg Candrian, Georgina Janki, Roman Niederberger, Lea Pfister, Nora Pfister, Guido Tschuor, Curdin Venzin, Anna Maria Welter. Reschia: Manfred Veraguth.

Il toc planisaus per 2013 ha stuiu vegnir refiers. Aschia ei quei toc vegnius tscharnius per il giubileum da 10 onns Uniun da teater Sagogn igl onn 2015. E per inaga ei vegniu dau la primavera e lu aunc en in clavau. La valischa d’aug Gieri ei ina cumedia digl autur american Pat Cook che descriva relaziuns famigliaras a moda fetg divertenta. Gieri habitescha persuls en ina casa lunsch naven dalla civilisaziun. El ei els onns ed in tip in tec per sesez. El ha envidau tut ses parents da passentar communablamein ina fin d’jamna tier el. Ils parents speculeschan, daco ch’els han survegniu quei invit: Ei Gieri malsauns, drova el daners ni va ei forsa perfin pigl artar?

Las figuras ein vegnidas giugadas da Martina Beeli, Georg Candrian, Georgina Janki, Roman Niederberger, Timéa Panier, Nora Pfister, Guido Tschuor, Anna Maria Welter. Reschia: Manfred Veraguth.

L’Uniun da teater Sagogn ei sedecidida da separticipar al Festival da teater a Tusaun 2014. Ella ha fatg quei cul cuort toc Igl examen per pedunzs da Jean Meyer ella versiun romontscha da Georgina Janki. Il toc tracta las absurditads dil mintgagi cun sias reglas per part plitost teoreticas che practicas: Tut ei reglementau fin e manedel, tut ei definiu exactamein e sch’ins fa stem dat ei zanua segir ina lescha ni melli paragrafs per tut il pusseivel e nunpusseivel che muossa tgei ch’ei lubiu e tgei buc. E buc mo quei: Bunamein per mintga pass sto vegnir dumandau per lubientscha. Il toc meina quella situaziun ad absurdum, quei cun bia humor. La situaziun da partenza ei numnadamein la suandonta: Quei che secapescha da sesez per mintga automobilista ed automobilist, vegn ussa er introduciu per pedunzas e pedunzs: in examen da qualificaziun!

Giugau han: Georgina Janki, Curdin Venzin. Reschia: Georgina Janki.

Giugar in classicher ei adina ina sfida per ina uniun d’amaturs. Tuttina havein nus ughegiau da far quei, cun adattar Il ranver da Molière (versiun romontscha: Leo Tuor) el temps d’entuorn 1900. La historia ei beinenconuschenta: Il ranver Arpagau ei in ranver fatg si cun pugn. Spargnar, spargnar e spargnar ei sia emprema devisa. Gie buc dar ora in rap damemia. Arpagau ha denton aunc ina secunda devisa: Rachergnar nua ch’ei mo va. E quellas devisas valan secapescha era pil maridar. Mo Arpagau ha fatg il quen senza l’amur. Tgi sto ceder, l’amur ni la ranveria?

Sin tribuna ein stai: Martina Beeli, Georg Candrian, Fina Cavelti, Georgina Janki, Stefanie Lombris ni Nora Pfister, Roman Niederberger, Timéa Panier, Guido Tschuor, Curdin Venzin, Adrian Welter, Anna Maria Welter. Per cant e musica han procurau: Giusep Tschuor (direcziun), Annalisa Candrian, Regula Casanova, Armin Cavelti, Claudio Cavelti. Reschia: Manfred Veraguth.

Treis habitaziuns, treis famiglias, treis constellaziuns. Aschia san ins resumar cuortamein il cuntegn dil toc Pralinès, hormons ed ina sibla. Quel gioga en ina surbaghegiada da pliras habitaziuns. Ed il publicum survegn investa en stiva, en cuschina ed en combra da treis famiglias: In pèrli che vul ir ad ina fiasta da costums, in um che vul far endretg a sia dunna ed a sia mumma, geniturs giuvens ch’ein per l’emprema ga senza lur affons. Atgnamein situaziuns fetg semplas e bein enconuschentas. Mo en quella cumedia englesa da Richard Harris ella versiun sursilvana dad Augustin Beeli giogan pralinès, hormons ed ina sibla è ina rolla, ed aschi san ins persequitar parallel co ei va sutsura en tuttas treis famiglias. Sco sche la communicaziun denter carstgauns fuss fatga per secapir falliu.

Giugau teater han: Martina Beeli, Georg Candrian, Georgina Janki, Stefanie Lombris, Nora Pfister, Guido Tschuor, Curdin Venzin, Adrian Welter, Anna Maria Welter. Reschia: Manfred Veraguth.

...

...